人齊入座

「人齊入座」這種病態行為，我懷疑，只會在香港發生，其他地方絕無僅有。

「人齊入座」的歇後語：唔該你班友仔未到齊唔好入來我餐廳齋坐唔食阻住我做生意，一陣等吓等吓食／坐幾個鐘我咪蝕晒？

香港人怕蝕底的心態果真表露無遺。

那天與朋友慶生，相約在中環一間casual的意大利餐廳晚飯。一早知道餐廳不接受訂位，所以約朋友早些到達以免要壽星女久等。朋友J先到然後whatsapp我：「人齊入座。」我心諗：死啦，肯定大排長龍。但朋友J話：「唔係呀，大把位喎。」

大把位又要人齊入座？咁自相矛盾精神分裂？To be fair，我明白，如果去吃碗魚蛋粉要人齊入座的道理，but hello？這裡是一間餐廳，不是茶餐廳喎，不是吃15分鐘急急腳要走那種喎。我趕著跑到餐廳，上氣不接下氣，心裡已無名火起，告訴服務員：「兩位。」她以奇怪目光注視我，呆了兩秒 (估計因J已告訴他我們是三位的)。
我接著說：「既然你要人齊入座，咁現在兩位人齊啦，到我朋友來到再換位啦，反正你哋都唔full無理由要我等。」正所謂你有張良計，我有過牆梯。
「… 唔… 我見今日唔太full就俾張三人枱你啦。」吓？？？你施捨我？

好戲在後頭，有咁多張空枱、廂座，他真的帶我們到一張正方形枱但只得三張椅子的地方坐下，我禁不住再問：「三個人就只可坐三張椅子，多一張椅放手袋都唔得？」張枱小得連全部食物都放不下，而我們只點了三款食物。

我跟J不約而同說，以後不要到人齊入座的地方晚飯。你看，怕蝕底的人通常蝕得更多。

講開香港怪談錄，A今天與我分享她遺失了一張manicure的會員卡，補發要收取$50，剛巧package用完，A問如果再買package可否免除$50手續費，得到的答案是：「今次當係俾個機會唔收你。」哦... 多謝阿sir俾個機會我，我以後唔敢啦。

Interesting。